Acara Nikah (Pangoli anak/Pamuli boru) suku adat Batak

 Setiap calon pasangan pengantin mempunyai nilai-nilai budaya dan adat yang berbeda-beda. Adapun suku batak ada bermacam-macam tetapi adat nikah tidak terlalu banyak perbedaan. Kesepakatan terhadap nilai-nilai sosial tersebut ditaati secara bersama di masing-masing budaya.Pernikahan memang bukan perkara yang sederhana, dibutuhkan persiapan yang matang baik mental maupun keuangan, maka dari itu perlu menyiapkan tabungan nikah di awal. Jika kebetulan pasangan Anda berbudaya adat Batak, pada sesi ini penulis langsung membahas dari acara demi acara adat nikah batak, berikut ini tata cara pernikahan adat Batak yang perlu Anda ketahui beserta maknanya:

*Bahasa Batak

Molo masihaholongan angka naposo jala martahi nasida mamungka rumah-tangga na imbaru, ianggo na jolo mamintor masileanan tanda do nasida songon mandar, saputangan, hepeng, cincin mas dohot na asing. Dungi dipaboa nasida ma tahi nasida i tu natorasna be. Borhat ma paranak mandapothon parboru laho masitandaan huhut manghata i mangarang-rang i angka naporlu taringot tu sangkap na naeng mardongan saripe anak dohot boru i.Alai andorang so i, bo i do parjolo pajumpang sahalak boru sian paranak dohot parboru (didok ma i domu domu) laho manghatai taringot tu balgani sinamot na naeng pasahaton ni paranak tu parboru (hira-hira songon na mandas-das i ma goarna). Dung hira-hira adong hadomuan, i pe asa borhat paranak mandapothon parboru. Asing sian i nunga sipata bo i pajumpang suhut paranak dohot parboru, alani naung adong hian partondongon nasida, ia so i ala nunga masitandaan hian manang alani pardongan on.Torop ni paranak na ro mandapothon parboru hira-hira tolu ripe, nunga tarmasuk disi sahalak boru. Songon i nang parboru manjalo haroro ni paranak sarupa ma torop na. Paranak disi ndang pola mamboan na marmiak-miak, alai bo i ma mamboan songon snek (makanan ringan) manang jagal manuk. Parboru pe ndang pola paradehon sipanganon, alai bo i ma patupahon kopi manang tes. Parborhat ni paranak tu bagas ni parboru i ma na nidokna patua hata manang marhori- hori dingding.Alai molo binereng do nuaeng, hira nunga bo i suhut paranak mandapothon suhut parboru di na patua hata, jala panghataion nunga di hata i bohi ni sinamot dohot ulos, songon i nang partording ni ulaon, di alap jual do manang taruhon jual.

Ruhut Pardalan Ni Patua Hata

Dung sidung marhori-hori dinding, borhat ma paranak rap dohot uduranna hira-hira 8 -15 keluarga laho patua hata laos marhusip tu jabu ni parboru.

Parsidohot ma di si haha-anggi ni paranak, dongan tubuna na sumolhot, boru, bere, dohot ibebere. Disagi ma bilangan ni nasida asa unang pagodanghu, alai ingkon dohot ma boru. Somalna nunga diboan paranak pande hatana.

Di partingkian songon on, asing do sian tingki na marhori-hori dinding na holan manggolom-golom sipanganon kue manang buah na tonggi. Ianggo di parborhat ni paranak saonari laho patua hata/ marhusip ingkon do mamboan sipanganon na marsintuhu; indahan na las dohot lompan na tabo na marmiak-miak, ima goarna tudu-tudu ni sipanganon.

Di suhut parboru pe nunga rade manjalo haroro ni paranka jala di jou parboru ma haha-anggina (dohot raja parhata), boru, bere, ibeberena, dohot piga halak dongan sahutana. Diparade parboru ma dengke si mudur-udur siadophonon nasida anon tu paranak dung sidung manjalo tudu-tudu sipanganon na binoan ni paranak.

Dung pungu uduran ni paranak (marjarak 3-4 jabu sian bagas ni parboru) di suru ma boruna manungkun tu bagas ni parboru manang naung boi nasida ro.

Dung mangarade parboru dohot na ginokhonna manjalo haroro ni paranak, dijouhon nasida ma antong dompak pintu haroroan asa masuk ma uduran ni paranak tu bagas.
Raja Parhata Paranak.

Horas Tulang…, Horas ma di Raja i. Hata ni natua-tua mandok :
Jolo nitiptip sanggar laho baen huru-huruan.
Jolo pinabotohon marga asa binoto partuturan.
Raja nami… ia hami na ro on parboruon muna marga .......
Horas ma di Raja i.Raja Parhata Parboru.

Horas ma tutu Amang boru.Dung i marsijalangan ma nasida angka na naeng martondong di bagasan las ni roha. Dipeakhon paranak ma sipanganon boan–boan nasida di tonga ni jabu (manang tu ginjang ni meja diadopan ni parboru), jala didok ma hatana :

Tulang na burju.. tona ni namborumuna ima dainang mandok molo borhat hamu anaha tu bagas ni Tulang mu na, ingkon do boanon mu sipanganon na tabo laho palashom roha ni Tulangmu sotung mangembal hamu, jadi Rajanami na marningot ma hami di tona i, ido umbahen na huboan hami sipanganon na tabo laho palashon roha ni angka Tulang.Raja Parhata Parboru

Mauliate ma tutu Amangboru, ingot do hamu antong di poda ni namboru nami, Horas ma di hamu.
Borunami… asa jolo sigati hamu jo boan-boan ni paribanmu.Alusni Boru ni Parboru
Di hamu hula-hulanami nunga husigati hami, jala suman do. (lapatanna lengkap do / adong do di si “ na margoar” manang tudu-tudu ni sipanganon).
Raja Parhata Paranak

Borunami… asa dongani hamu paturehon dipudi (diboan ma tu dapur asa dihobasi satongkin, mangaturhon na margoar diginjang ni talam na bolak, alana satongkin nari ingkon tangkas do dihatahon hasahatan ni i diadopan ni parboru andorang so rap marsipanganon).Raja Parhata Paranak:

“Di hamu Tulang, molo naung rade hamu, asa ro hami nian mandapothon hamu.” (maksudna laho pasahat tudu-tudu ni sipa-nganon)Raja Parhata Parboru:

“Di hita namardongan tubu, Raja ni Boru, Bere, dohot Raja ni Dongan Sahuta, ala naeng ro ma Raja ni Pamoruonta mandapothon hita, asa rap manjalo ma hita.”Raja Parhata Paranak:

“Di hamu Tulangnami (ndang apala didok dope hula-hula) di ari na uli di bulan na denggan on ro do hami pamoruonmuna pasahat tudu-tudu ni sipanganon na marsaudara, tudu-tudu ni panggabean parhorasan ma on di hamu Rajanami. Molo tung songon on pe na boi hupasahat hami ditingki on, las ma rohamu manjalo. Songon hata ni situa-tua ma dohonon,
Huta tano bato parasaran ni leang-leang,
Horas ma di hamu na manjalo, horas di hami namangalean.

Diolophon na torop, “horas ma tutu!”, laos masijalangan.

Raja Parhata Parboru:

“Di hamu Raja ni Pamoruonnami, hami pe naeng ro ma mandapothon hamu.”

Laos digorahon ma boruna nasida asa diboan na laho sipasahaton nasida, ima dengke simudur-udur.

“Di hamu Raja ni Pamoruonnami, dison hupasahat hami tu hamu dengke simudur-udur, dengke sitio-tio, dengke sahat, dohot pangidoan tu Tuhanta, asa sai mudur-udur ma hamu tu dolok tu toruan, tio ma aek inumonmuna, jala sahat ma angka nauli angka nadenggan di hamu.” Diolophon angka na torop, “Ima tutu.”

Raja Parhata Parboru:

“Ala hamu do na ro mandapothonhami Amangboru, ba asa marsipanganon hita, sian hamu ma namamboan tangiang. Hupasahat hami ma tu hamu.”

Raja Parhata Paranak:

“Nauli ma i Tulang.”

Dipangido ma donganna mambahen tangiang mangan. Jala dung simpul tangiang marsipanganon laos didok ma hata dai sira ni sipanganon i,

Sitiktik marsigompa, golang-golang pangarahutna,
Molo tung songon on pe natarpatupa hami, sai godang ma pinasuna.

Marjomukma hita.Diolophon na torop, “ima tutu!”

Raja Parhata Parboru:

“Di hita na mardongan tubu, Raja ni Boru, Bere, lumobi di Raja ni Dongan Sahuta, molo tung di jolo ni hasuhuton pe tudu-tudu ni sipanganon on, ba na rap mangadopi ma hita di son.” (Diolophon nasida).

Dung i dipangido ma pamoruonna maneati aliang-aliang dohot ate-ate ni sipanganon i (somalna nian, sian pamoruan ni paranak do, alai dos ni roha nama i).

Raja Parhata Paranak:

Manariashon, patamahon tu dongan tubuna dohot uduranna taringot tu dekke naung dijalo nasida sian parboru.
Di hita namardongan tubu, suang songon i di Boru, Bere nami, molo tung dijolo ni hasuhuton pe dengke napinasahat ni Raja i, naung rap manjalo ma hita ate?” Diolophon uduran ni paranak, nauli.


DUNG SIDUNG MARSIPANGANON

Raja Parhata Parboru:

“Di hamu Raja ni Pamoruonnami, nangkin tangkas do dipasahat hamu tu hami tudu-tudu ni sipanganon na marsaudara.
Didok hata ni natua-tua, andorang so diseat raut jolo diseat hata. Boha Amangboru, tarsongon dia partording ni tudu-tudu ni sipanganon naung pinasahat muna on tu hami?”

Raja Parhata Paranak:

“Nauli Tulang. Taringot tu tudu-tudu ni sipanganon naung hupasahat hami tu hamu Rajanami, ba surung-surungmuna do i. Botima Tulang!”

Raja Parhata Parboru:

“Mauliate Amangboru. Gabe jala horas ma di hamu.”
“Di hita namardongan tubu, Raja ni Boru, Bere, lumobi di Raja ni Dongan Sahuta, nunga tangkas husungkun hami Raja ni Pamoruonta, didok nasida ia tudu-tudu ni sipanganon on surung-surungta do ninna. Boha saonari ma tabagi?”

Dialusi pihak (horong) parboru, “Annon ma tabagi.”

“Antong molo songon i, di hamu Borunami, asa boan jala pature hamu tudu-tudu ni sipanganon on. Unang lupa pasahat hamu tangkas jambar tu Raja ni Dongan Sahuta, ate!”

NB : Somal na ni parbagi jambar di ulaon Patua Hata/Marhusip
Ala tangkas do dihatahon surung-surung ni parboru tudu-tudu ni sipanganon na, pinasahat ni paranak i tarsongon on ma parbagi jambar.
Contoh suhut parboru Raja Pane
Raja Dori = Namarngingi Parsiamun
Raja Boltok = Namarngingi Parhambirang
Boru tubu (boru suhut) = Osang parsiamun
Boru (boru ni punguan Sitorus) = Osang parhambirang
Raja Parhata = Somba-somba
Dongan Sahuta = Soit
Haha/Anggi Raja Pane (Suhut) = Angka jambar na tading termasuk mai Ihur-ihur

Raja Parhata Paranak:

“Suang songon i di hamu Borunami asa pauli hamu dengke naung tangkas tajalo sian Raja i”

Protokol ni Parboru:

“Boha Amangboru, nunga boi tauduti panghataionta?”

Raja Parhata Paranak:

“Nauli Rajanami.”

Raja Parhata Parboru:

“Alai mangido tingki hami satongkin, asa jolo mangalap hata jala masipasangapan jolo hami na mardongan tubu.”
Songon on ma hatana:
“Di hita na mardongan tubu, Raja ni Boru, Bere, Raja ni Dongan Sahuta, ala naeng pungkaonta ma panghataion, asa martangi-tangian hita. “Jala laos songon i ma di hita namardongan tubu. Songon naung somal taulahon, ala hami haha doli muna ma nuaeng songon hasuhuton bolon, jadi hamuma na gabe raja panungkun, raja hata, di ulaonta on. Songon hata ni situa-tua na mandok :

Molo tinallik huling-huling tarida ma holi-holi.
Molo haha na gabe husuhuton, ba anggina na ma na gabe panamboli.
Jadi di hami haha dolimu Raja Pane ma nuang hasuhuton ma hamu anggi doli Raja Dori dohot anggi doli Raja Boltok ma na gabe panamboli.

Dijalo Raja Dori ma pangidoan ni suhut (protokol ni Parboru) i.
Mewakili Raja Dori :
Toho do tutu na ni dokni haha doli
Molo tinallik huling-huling tarida ma holi-holi.
Molo haha na gabe husuhuton, ba anggina na ma na gabe panamboli.
Songon naung somal taulahon dihita namarhaha maranggi Sitorus, ala haha doli Raja Pane ma nuaeng hasuhuton, ba dohot on pinasahatma tu anggi doli Raja Boltok na gabe Parsinabung (Raja Hata)
Songon i ma Raja Boltok mar dos ni roha ma nasida ise nagabe Parsinabung (somalna nunga dos hian tahi nasida ise nagabe Parsinabung).

Raja Parhata Parboru:

“Mauliate ma dihamu suhutnami. Tangkas do dipasangap hamu hami dongan tubumu. Hujalo hami ma pangidoanmuna i. Toho do i tutu, sada songon daion mual do hita nasailaon, si sada anak si sada boru. Sahali nari mauliate ma di suhut-nami.”

Laos diuduti ma panghataion tu Paranak. “Di hamu Raja ni Pamoruon nami, molo dung rade hamu asa tapungka manghatai.”

Raja Parhata Paranak:

“Nauli Rajanami, alai lehon hamu jolo tingki di hami pamoruonmuna, asa jolo masipasangapan hami namardongan tubu.” (dioloi parboru).

Jala dung dos roha ni paranak, ditontuhon ma sahalak Raja Parsaut di nasida. Jala diuduti Raja Parsaut i manghatai.
NB :
Nian sian mulana pe nunga hira tangkas ise na gabe Parsaut, baik sian pihak parboru songoni nang pihak paranak. Alai i do huroha bangkona dohot pangalaho ni ruhut-ruhut paradaton i, lumobi di na manat mardongan tubu.

Raja Parhata Paranak:

“Tulang Raja Bolon, nunga rade hami.”

Raja Parhata Parboru:

Manghatai ma hita amangboru. Nunga tung las rohanami manganhon sipanganon nabinoanmuna i. Bosur hami mangan indahan na las, sangat marlompan juhut na tabo dohot minum aek sitio-tio. Asi ma roha ni Tuhanta, sai dipasu-pasu ma i, asa pamurnas ma i tu daging, saudara tu bohi, sipalomak imbulu ma i, sipaneang holi-holi, jala sipasindak panaili.
“Mauliate ma di hamu. Jala dohonon ma songon hata ni situa-tua:

Bagot na marhalto na niagatan di robean,
Horas ma hami na manganhon,
ditambai Tuhanta ma di hamu na mangalean.
“Asa jolo ninang-nang do asa ni nungnung, jolo pinangan do asa ni sungkun”.
Na manungkun ma hami tu hamu amangboru nami taringot tu sintuhu ni indahan masak dohot lompan na tabo i.

Dia ma matana, dia ma haltona,
Dia ma hatana, diama na ni dok na.”

Raja Parhata Paranak:

“Gabe jala horas, Rajanami. Namanungkun ma Raja i di hata ni indahan masak dohot lompan na sosadia i. Alai jumolo ma hupasahat hami mauliate. Malambok pusu hami di panjalo, di panjangkonmu tu hami pamoruonmuna on.
“Taringot disungkun-sungkun ni Raja i, ia hata ni sipanganon i songon hata ni natua-tua ma dohononnami Rajanami:

Otik si butong-butong, godang si pir ni tondi.
Otik so sadia pe na boi hupatupa hami Rajanami,
Sai pamurnas ma i tu daging, saudara ma i tu bohi,
Huhut sipasindak panaili.
“Taringot tu hatana, panggabean parhorasan do Rajanami. Botima!

Raja Parhata Parboru:

“Mauliate ma amangboru, panggabean parhorasan do hape haroromuna di tingki on. I do nataparsinta. Alai, sai marangkup do inna nauli, mardongan do na denggan. Asa siangkupna songon na hundul, jala siudurna songon na mardalan.
Na manangkasi ma hami di hamu amangboru,
Asa tangkas ma uju ni Purba, tangkasan uju Angkola,
Tangkas ma tutu hita maduma, tangkasan ma hita luhut mamora.
“Tangkas ma dipaboa Amangboru tu hami asa adong sibegeon ni sipareon jala sitiopon di roha. Botima!”

Raja Parhata Paranak:

“Tangkas ma tutu paboaon tu Raja i, siangkup ni panggabean parhorasan di haroronami mandapothon hamu di tingki on i ma :
“Ro alu-alu ni anak nami tu hami, paboahon naung tangkas masitandaan jala masihaholongan dohot boru ni Raja i sian bagas on. Di dok tu hami, ‘Bapatua laho ma hamu mandapothon Tulang Marga Sitorus na marhuta Siantar, ala nunga masihaholongan hami dohot boru ni Tulang i, jala nunga mardos ni roha, satahi-sapanghilalaan hami laho mamungka parsaripeon,’ ninna alu-aluna tu hami Rajanami.
“Tarsonggot do hami umbege alu-aluna i, nang pe las roha-nami. Alana, tingkos do di rohanami, ro anak nami tu bagas muna on. Alai, molo hurimangi hami dirinami tung na so barani dope hami mandapothon Raja i, molo sian hadirionnami. Alai, ala las ni roha dohot holong do namamboan hami dohot anaknami ro tu jolo ni Raja i di tingki on, jala nunga tangkas huida hami, minar-minar do bohimuna manjangkon haroronami, on pe Tulang, molo tung siat elek-elek pangidoannami, asa unang holan hata ni naposo be hata ni nasida nadua i, asa mangihut ma nian gabe hata ni angka natua-tua.
“Jadi Tulang, na patua hata ma haroronami di tingki on. Asa ima elek-elek pangidoan nami. Botima!”

Raja Parhata Parboru:

“Mauliate ma Amangboru”.
“Asa di hita na mardongan tubu, Boru, Bere, suang songoni Raja ni Dongan Sahuta, nunga tangkas tabege sian pamoruonta di haroro nasida, i ma di napatua hata. Andorang so ni lehon tingki di laho mangido pandapot sian hita, jolo tapatangkas ma jolo borunta ate, manang natutu do dijalo hata sian anak ni pamoruonta.
Alai amangboru na manangkasi ma hami alana torop do borunami di bagas on na dia ma i nuaeng jala ise ma goarna, asa hutangkasi hami boru nami”.

Dung di dok paranak goarni si boru na tinodo ni anakna, di suru Parsinabung ni Parboru ma tu boruna:

“Di hamu borunami, sungkun hamu jolo maenmu.”

Alus ni boru sian pudi: “Sintong jala tutu do Amang na ni dok nasida i.”
Dung i diuduti ma muse panghataion

Raja Parhata Parboru:

“Asa di hita na mardongan tubu, Boru, Bere, Raja ni Dongan Sahutanami asa talehon pandapotta. Jala parjolo ma sian dongan tubu, haha doli/anggi doli, Boru, Bere, Dongan Sahuta.”

Hata sian haha doli/anggi doli, Boru, Bere, Dongan Sahuta manolopi nauli nadenggan sude. Jala ndang apala ris jala sude manghatai, alai porlu do lehonon tingki tu nasida.
“Mauliate ma di hamu saluhutna. Jadi nuaeng pe hupasahat ma jolo tu suhut nami di jabu on.
Suhut/Paidua ni Suhut:
“Mauliatema, molo sian hami hasuhuton, sian mulana pe nunga tangkas hupasahat tu hamu haha/anggi. Sisada hata ma hita, bulung ni dakkana do bulung ni rantingna, ulaon ni hahana do ulaon ni anggina. Tandokmu do tandokku, pandokmu do pandokku. Jadi gabehon da amang. Ima sian hami hasuhuton. Botima!”

Raja Parhata Parboru:

“Jadi di hamu amangborunami, nunga dibege hamu angka pandapot sian hami. Nunga satolop hami asa hujalo hami ma haroromuna di napatua hata. Sai didongani Tuhanta ma hita sude jala dipasu-pasu angka ulaonta. Botima! Horas ma di hita saluhutna.”

Acara Marhusip

Dalam marhusip akan lebih dimatangkan lagi. Di samping itu, ketika marhusip pula akan dibicarakan tentang sinamot yang akan dibicarakan secara khusus pada marhata sinamot. 

Perbedaan dari marhusip dan marhata sinamot terletak pada keterbukaan. Dalam marhata sinamot, pembahasan perihal uang jujur atau tuhor lebih terbuka dibanding marhusip yang masih rahasia atau hanya berbisik-bisik pada adat Batak Toba.

Di parserahan on, na binereng di tingki na marhusip, nunga di jou paranak angka raja ni partubu, songon i nang parboru. Paranak nunga mamboan sipanganon, jala godang ni paranak dohot parboru, sipata nunga hira naeng dos di tingki na marhata sinamot. Panghataion dison tarsongon on ma na binereng di pangarantoan on:

Pihak paranak (sian raja parhata) pasahathon tu pihak parboru tahi ni naposo (anak nasida dohot boru ni parboru) ima nanaeng mamungka parsaripeon na imbaru nasida.
Pahantushon hata ni domu-domu taringot tu balga ni sinamot na naeng pasahaton ni paranak tu parboru.
Dialaman ni ise ulaon unjuk ( dialap jual manang di taruhon jual )
Piga ulos na naeng pasahaton ni parboru tu pihak paranak
Andigan martumpol, sekaligus ma i di taringoti tu na marhata sinamot.
Songon on ma pardalan na
Raja Parhata Paranak :

“Mauliate malambok pusu rohanami Tulang, dinaung tangkas dioloi hamu elek-elek pangidoannami di napatua hata. Huulakhi hami mandok mauliate ma di hamu Rajanami. “Alai Tulang, songon i do huroha pangalahona, molo tung siat muse elek-elek pangidoannami, asa tauduti ma nian tu na marhusip na gogo manang mangrangrangi di angka ulaon na mangihut, na mardomu tu sangkap parsaripeon ni anak nami dohot boru ni Raja i, marlambas roha ma Raja i mangoloi pangidoannami. Botima”.

Raja Parhata Parboru :
“Mauliate di Raja ni Pamoruonnami. Andorang so hualusi hami lehon hamu jolo tingki, asa mangalap hata dohot tahi dihami angka na mardongan tubu, boru, bere, nang di raja ni dongan sahuta nami. Ditariashon ma tu sude horong ni parboru i taringot tu ulaon parhusip on. Jala sude manolopi. “Ala nunga dos rohanta, mauliate ma!”
“Ipe di hamu Raja ni Pamoruonnami, taringot tu pangidoanmuna i hujalo hami ma i, songon dia husip-husip manang angka dia ma naung disangkapi rohamu, hupasahat hami ma tingki tu hamu asa hamu ma namanariashon. Botima!”

Raja Parhata Paranak :
“Gabe jala horas ma Tulang. Nunga tamba las ni rohanami. Songon na hudok hami nangkin, diharoro nami tu bagasmuna on ala adong alu-alu ni anak nami naung ro tu bagasmuna on, jala sai dihatahon do tu hami haburjuonmuna. 

Santabi ma Rajanami, didok natua-tua :
ida-ida do tu na butong, jora-jora tu namale. Asa nunga tangkas huida hami di haburjuonmuna marboru.“Tulang, andorang so hutariashon hami husip-husip dohot pangidoannami, mangido tingki hami satongkin na marhaha-anggi asa masipasangapan jolo hami, songon i tu boru dohot berenami.
“Di hita saluhutna, nian andorang laho borhat pe hita tu bagas ni hula-hulanta dijabuon, nunga sada tahinta jala sisada pangidoan hita laho mangelek dohot pasahathon angka pangidoanta. Beha, ahu ma napasahathon elek-elek pangidoanta ?”Ditolopi sude sian horong ni paranak.

“Di hamu Tulang, dohot sude hamu na huparsangapi hami. Sian hami pamoruonmu mangido mangelek hamu, asa tung sangap hamu, Rajanami, hami ma nian na pabolak amak jala tomu-tomuon nami ma haroro ni Raja i dipogu ni alaman nami, jadi ulaon taruhon jual ma nian Rajanami laos ulaon sadari (paulak une). “Taringot tu somba ni uhum, somba ni adat manang sinamot ni boruni raja i, Rajanami, nunga dos rohanami dohot tahinami, asa sisahali mangelekhon, sahali manombahon ma hami tu hamu, Rajanami, sitombol. I ma jolo elek-elek pangidoannami.”

Raja Parhata Parboru :
“Mauliate ma di Raja ni Pamoruonnami. Nunga tangkas hubege hami pangidoan muna i, i ma di sangkapmuna ulaon taruhon jual, ulaon sadari. Tarsingot di ulaon taruhon jual ido sasintongna Paranak do na pabolak amak laho hundulan ni hula-hulana (Parboru). Tarsingot di pangidoanmuna na sahali manombahon hamu di sinamot ni borunami, asa tangkas taingot ndang na marhata sinamot do pe hita Amangboru. Songon pangidoanmuna nangkin, na marhusip-husip dope hita di tingki on. Alai na denggan ma i tutu, ingkon jolo ni rangrang do angka na naeng ulahononta haduan. Asa hupasahat hami ma jolo panghataion on tu hami na mardongan tubu, boru, berenami, nang di raja ni dongan sahutanami.

Haha/anggi dongan tubu : 

“Di hamu pamoruonnami, taringot di ulaon taruhon jual dohot ulon sadari, mauliate ma. Alai molo taringot tu sinamot ni borunami, tung tangkas jala godang pasahat hamu, asa las rohanami hula-hulamu. Asa ndang apala horbo, hoda dohot angka mas hupangido hami, alai tangkas ma godang bahen hamu, Amangboru. Botima!”

Boru, bere, pariban : 

“Molo sian hami, songon nanidok ni hula-hula/tulangnami nangkin do. Asa las roha nasida, pasahat hamu godang sinamot ni paribannami i. Botima!”

Dongan sahuta : 

“Mauliate ma di hasuhutonnami di jabuon na mangalehon tingki manghatai tu hami. Sian hami, molo dung dos rohamu, denggan masipaolo-oloan, na marhula-marboru asa dapot ma tarida di si songon hata ni natua-tua: Bona ni aek puli ma di dolok Sitapongan Gabe jala dapot ma di hamu angka na uli ala naung tangkas masipaolo-oloan., Gabe ma jala horas sian hami dongan sahuta, botima.

Raja Parhata Parboru :
“Di hamu Raja ni Pamoruonnami, nunga apala tangkas dibege hamu di angka panghataion dohot pangidoan sian hami. Taringot di pangidoanmuna, ulaon sadari, hujalo hami ma i. Alai taringot di sinamot ni borunami, di dok hamu sisahali manombahon jala sitombol, Amangboru tarsingot tu suhi ni ampang na opat dohot panandaion tangkas do padalanonmu di tongan ni mangajana. Jadi asa tung tangkas godangma pasahat hamu, S

Songon nidok ni natua-tua :
Nunga pitu lilinami, paualu jugianami, Nunga uli nipinami, ai gok ma sinamot di hajutnami.“Ipe Raja ni Boru, huoloi hami ma pangidoanmuna i jala tangkas ma hatahon hamu sian i.”

Raja Parhata Paranak :
“Mauliate ma di hamu Rajanami. Suang songon i di paribannami dohot raja ni dongan sahuta ni Raja i. Malambok pusu jala lumbang panghilalaannami di naung tangkas dioloi hamu angka pangidoannami. Suang songon i di sinamot ni Boruni Raja i, na naeng parumaennami, ima sitombol. Ia godang ni sinamot na laho sipasahatonnami Rajanami, Rp 10.000.000 (sampulu juta rupiah) ma. Asa las ma rohamu jala gabehon hamu ma i Rajanami. Botima!

Raja Parhata Parboru :
“Mauliate ma di Raja ni Pamoruonnami, nunga tangkas hubege hamu sinamot ni borunami, godangna Rp 10.000.000 (sampulu juta rupiah). Jadi di hita pe na mardongan tubu, lumobi hasuhutonnami, songon i di boru, bere, dohot dongan sahutanami, ala nunga dos rohanta jala taoloi nangkin pangidoan ni pamoruonta, ba taoloi jala tagabehon ma i. “Alai, di hamu Raja ni Pamoruonnami, taringot tu jambar na gok ima suhi ni ampang na opat dohot panandaion, asa tangkas muse pasahat hamu tu hami. Taringot tu bilanganna, hupasahat hami ma tu hamu haduan marhite suhutnami.

”Catatan :
Sijalo suhi ampang na opat ima nanidok : Sijalo bara (amang tua/amang uda ni boru muli), Simandokhon/simanggokhon (iboto ni boru muli naung hot ripe, molo so adong boi do sian ama manang ompung martinodohon), Pariban (haha ni boru muli manang namboruna), Tulang (iboto ni inang ni boru muli). Ia sinamot ndang tarmasuk suhi ni ampang naopat, alai upa suhut ma i langsung tu nampunasa boru muli. Taringot tu panandaion, boi ma ditorushon tu: Haha-anggi, anak manjae sian namartinohon ni hasuhuton. Ompu suhut ni namuli Ompu bao ni namuli Parorot (namboru ni boru muli) Paidua ni suhut, sian angka ompu namartinodohon, dst.
Raja Parhata Parboru :

“Na porlu muse tahe Amangboru, taringot tu si jalo tintin marangkup, tu haha parhundul nami, tulang ni nanaeng hela nami, narap paradehon ma hita di ulaon i muse.Raja Parhata Paranak :

“Nauli ma i, Rajanami.”Raja Parhata Parboru :

“Di hamu Raja ni Pamoruonnami. Asa dos tuatna, dos nangkok na, molo tung adong sidohonon manang pangidoan mu tu hami. Hupasahat hami ma tingki on tu hamu.”Raja Parhata Paranak :

“Mauliate ma Rajanami. Adong do sipangidoan nami tu hamu. Na mauas jala masihol do hami diangka tangiang dohot pasu-pasu sian hamu Rajanami. Jala molo sian elek-elek pangidoan nami, asa sude ma hami pamoruonmu ulosanmu dohot ulos herbang di ulaon i muse. Songon i ma pangidoan nami.”Raja Parhata Parboru :

“Pos ma rohamu Amangboru, sude do hamu pasu-pasuonnami, lumobi ditangiang nami. Alai songon ulos herbang sipasahaton nami tu hamu, bilanganna 11 (sampulu sada) lembar ma. Alai sude do hamu muse dapot ulos nang pe sian ulos-ulos natinonun sadari. “Hombar tusi tahe Amangboru, taringot tu ulos-ulos i dohot pinggan panganan, dos ma rohanta ate, asa marsinakkohi tangga ni balatukna (masialusi di ibana be) ma hita Raja ni Boru?”Raja Parhata Paranak :

“Mauliate ma Rajanami. Hujalo jala hugabehon hami ma i.”Raja Parhata Parboru :

“Naporlu muse hataanta ima taringot tu teknis ni ulaon, ari ni ulaonta i, tempat (gedung), angka undangan. Hombar tu si, dumenggan hamu na patorangkon.Raja Parhata Paranak :

“Mauliate ma Raja nami. Tarsongon on ma konsep manang rencana nami:Partumpolon di Gareja ………………….. tanggal……….. pukul ……………
Ting-ting parjolo tanggal ………….
ting-ting paduahon tanggal ………….
Pamasu-masuon tanggal…………,
di gareja (tempat) ……….….
Sibuha-buhai di ………… pukul …………..
Ulaon unjuk (pesta) di alaman ni paranak di gedung …… alamat…………..
Godang ni undangan tu parboru ….. undangan, di paranak ……….undangan. Dohot angka na asing dope.
Raja Parhata Parboru :

“Mauliate ma di hamu pamoruon nami. Taringot di angka parjambaran, nasomal i ma ate? Jala sidapot solup ma hami hula-hulamu. Alai, molo boi boto on nian, antar songon dia panjuhuti diulaon i.Raja Parhata Paranak :

“Nunga dihusiphon suhutnami. Molo panjuhiti ima lomuk manang didok nuaengon namar-manmiak-miak (pinahan lobu/B2), i do Raja nami.”Raja Parhata Parboru :

“Ala nunga hira sude tahatai, tarang-rangi di sangkap ni ulaonta, saonari sahat ma hita tu namarhata si gabe-gabe. Hami sian hula-hula ma napasahathon jala hamu sian pamoruonnami ma namangampu, ate! Alai andorang so taujungi dijahahon ma jolo angka naung disurati dohot naung dirangrangi (notulen).Boi do sian parboru manang paranak manjahahon keputusan i. Dung sidung manjahahon notulen di uduti ma muse.

Amangboru asa lehon hamu jo tingki di hami laho mangalehon poda tu borunami.Raja Parhata Paranak :

Nauli Tulang.Raja Parhata Parboru : Mangalehon poda tu boruna asa unang be mampar rohana jala patoranghon nunga manghatai natua-tua.
Raja Parhata Paranak : Suang songoni do hami Tulang lehonon nami do poda tu anak nami. Mangalehon poda tu anakna asa unang be mampar rohana jala patoranghon nunga manghatai natua-tua. Sekaligus menyuruh ke dua calon mempelai untuk menyalami semua yang hadir.
Suhut/Paidua ni Suhut sian Parboru : “Mauliate ma di hita saluhutna, lumobi di Tuhanta. Jumolo hupasahat hami mauliate di dongan tubu, haha/anggi, raja ni boru, bere, dohot raja ni dongan sahuta nami, ima di naung rade rohamu mandongani hami ..dst. Suang songon i di pamoruonnami marga.., dohot uduranmuna .dst.
Raja Parhata Paranak:

“Hita pe na ro tu bagas ni hula-hulanta di son, dos ma rohanta. Molo namangampu hata nauli nadenggan sian hita, langsung ma tu haha/anggi doli hasuhutonnami. Botima!” Suhut/Paidua ni Suhut sian Paranak: “Mauliate ma di Tuhanta, mauliate ma di hamu sude hula-hulanami, pariban dst.Raja Parhata Parboru :

“Nunga denggan mardalan ulaonta sadari on, jala nunga godang tahatai, tarangrangi na hombar tusi, jadi asa mardalan ma ingot-ingot (hepeng). (Nunga diparade hian hepeng laho ingot-ingot i. Dipasahat pihak paranak ma i tu Parsinabung ni Parboru, jala Parboru pe diparade do hepeng ingot-ingot si pasahathon na tu Parsinabung ni Paranak, jala somal taida adong indung ni ingot-ingot i ima na gabe di Parsinabung ni Parboru dohot Parsinabung ni Paranak).Hata umpasa sian Parsinabung ni Parboru :

Nunga jumpang tali-aksa ihot ni ogung oloan Nunga sidung sude hata, ala tangkas do hita masipaolo-oloan Bulung ni losa ma tu bulung ni indot Bulung motung mardua rupa, Sude na tahatai i ingkon taingot asa unang adong hita na lupa ….;
Ingot-ingot; ingot-ingot; ingot-ingot. Diolophon natorop.Note : Dibagi ma ingot-ingot i jala ingkon sude do na ro di ulaon i dapotan ingot-ingot, kecuali hasuhuton bolon Paranak dohot Parboru.
Raja Parhata Parboru :

“Boha Amangboru, ala nunga renta jala singkop be ulaonta, asa taujungi (tatutup) di bagasan ende dohot tangiang. Boha Amangboru, ise ma namanutup?Raja Parhata Paranak :

“Mauliate ma Rajanami. Sian hamu ma mamboan tangiang.”Raja Parhata Parboru :

“Dos ma rohanta. Ala dison do natuatua i St …………… ba pinasahat ma tu nasida.” Marende jala ditutup ma dohot tangiang. Sambil mangaso (istirahat) satongkin, manghata-hatai, dihobasi boru ni hasuhuton parboru ma di dapur siboanon ni paranak, ima dengke, songon ulak ni sipanganon nabinoan ni paranak, laos tu panci manang sambongna i ma i dibahen, jala tangkas dipasahat tu pihak paranak. Masijalangan ma jala marhehe nauli ma angka tutur. Ima sahatna. Gabe ma jala horas!Catatan :
Ise na gabe Parsinabung (Raja Parhata) di ulaon Patua Hata; Marhusip laos ibana do na gabe Parsinabung (Raja Parhata) di ulaon unjuk (pesta adat) Di acara marhusip (mangarang-rangi), molo pangoli naeng mangalap paribanna (boru tulang) laho gabe ripe (isteri), porlu ingoton : Tingki na mangelekhon somba ni adat berupa sinamot Parhata ni Paranak, unang be mangihut hata “sitombol” manang “rambu pinudun”, songon i hata “ulaon sadari”. Alana, paribanna do dialap pangoli jala na patio mata ni mualna do i muse. Alai sudena i tu dos ni roha ma. Tulang ni pangoli unang be didok sijalo tintin marangkup, alai gabe sijalo surung-surung ma i. Ulaon sadari (paulak une) dipatupa di ari namangihut sesuai tu dos ni roha ni Parboru dohot Paranak. Dungi marudut ma tu ulaon Marhata Sinamot.

Acara Martumpol

Martumpol lapatanna marpadan di jolo ni Huria dohot dijolo ni na torop, ala naeng manjalo pasu-pasu parbagason ma pangoli dohot boru muli.Ndang apala sude Huria patupahon partumpolon. Na deba holan mandaftar natoras ni pangoli dohot natoras ni boru muli tu kantor ni gereja na, dungi diting-tinghon Huria ima di parmingguon na mangihut. 

Di Huria Kristen Batak Protestan (HKBP) di partumpolon i di patupa do kebaktian na jempek, somalna di botari manang di parnangkok ni mata ni ari. Molo di parserahan on sai dipatupa do i di parnangkok ni mata ni ari, alana di uduti do i annon tu na marhata sinamot. Jadwal martumpol di patupa do i sada manang dua minggu andorang so manjalo pasu-pasu di Huria.

Dung sidung martumpol diting-tinghon Huria diparmingguon na mangihut dua hali marturut-­turut (ting-ting parjolo dohot ting-ting paduahon). Alai olo do holan sahali tingting, ala mamereng tingki, manang ala ni pangoli manang boru muli ingkon borhat tugas tu ruar kota. Lapatan ni diting-tinghon di Huria, ima songon boa-boa patariashon huhut mangalehon tingki tu ruas i, atik beha adong na keberatan di sangkap na naeng marbagas i, misalna ala adong dope bogasna manang janji ni pangoli manang boru muli tu halak na asing. Ia ulaon martumpol on ulaon Huria do i ndang tarmasuk on ulaon adat.

Marhata Sinamot
Sinamot ima songon ringgit si tio soara (uang tunai), mas, pinahan (ternak) sipasahaton ni paranak tu parboru di ulaon pangolihon anak/pamuli boru. Alana na jolo di Bona Pasogit sinamot ndang sae holan marrupahon ringgit sitio soara (uang tunai), alai ingkon sai di tambai dope i dohot angka barang na arga songon: mas, perak, horbo, hoda manang lombu. Alai ianggo nuaeng on tarlumobi diparserahan di pasada gabe hepeng. Sinamot on ma na nidok ni parboru, songon tuhor ni boru. Di Toba somalna ulaon unjuk i (pesta) di patupa do di alaman/huta ni paranak (didok ma i taruhon jual). Jadi sinamot na ni lehon ni paranak i polin doi tu parboru lapatanna ndang di bahen i tu na mosok (biaya pesta). I do alana ianggo na jolo di na pamuli boru, sai na maruntung do parboru molo binereng sian segi materi. Alai di tingki saonari on tung pe ulaon i di alaman ni paranak, pihak parboru nunga ingkon manamba i tu haporluon pamulihon ni boruna, lumobi molo ulaon unjuk i di alaman ni parboru (dialap jual). Misalna laho melengkapi pahean dohot perhiasan ni boruna i, ndang hea be tuk sian sinamoti, baliksa manamba i dope parboru laho mangalehon tu suhi ni ampang na opat dohot tu tulang ni hela, ima songon tintin marangkup.
Catatan : Na nidokna suhi ni ampang na opat ima :
a. Pamarai. ima haha manang anggi ni natoras parboru i.
b. Sijalo bara/simolohon ima iboto ni boru muli
c. Namboru manang pariban ni boru muli.(upa parorot)
d. Tulang ni boru muli ( si jalo todoan )

Di parserahan on, somalna manghatai taringot tu sinamot, dipatupa do i dung sidung martumpol, ima di bagas ni parboru i, jala di goari ma ulaon i marpudun saut. Dison nunga dipasahat paranak patujolo ni sinamot tu parboru, sebagian besar, hira-hira saotiknai ma sian sinamot i na so dipasahat, manang ditinggalhon. Marpudun saut lapatanna saut ma ulaon i, jala sude naung ni hataan ni angka natua-tua ndang bo i be munggil-unggil. Molo adong na mangose bo i do gabe mardando. 

Di ulaon marhata sinamot nunga tangkas sude ditaringoti sahat tu ulaon unjuk, songon na padasiphon panghataion angka naung di hata i ditingki na marhusip. Ndang mardalan pinggan panungkunan di namarpudun saut manang di namarhata sinamot, jala todoan tu suhi ni ampang na opat somalna ndang dipasahat dope disi. Ia ulaon marhata sinamot nunga sipata gabe ulaon na balga, lumobi molo ulaon unjuk di ari na naeng ro on (na naeng sipatupaon na), antar dao sian huta ni parboru, misalna di luar ni propinsi, alana hira disi ma parboru laho manjalo singirna. Sasintongna di na marhata sinamot, bo i do sesuaihonon tu torop ni na ginokhonna, lapatanna bo i do hula-hula i sada manang dua ripe sian paranak songon i nang sian parboru (hula-hula. tangkas / na solhot).
Fungsi ni hula-hula di na marhata sinamot ima, songon na menyaksihon dohot maniroi ulaon i, atik tung adong panghataion diantara pihak paranak dohot parboru na so mardomu. Bona tulang, tulang rorobot, hula-hula ni haha anggi dohot hula-hula anak manjae ndang pola sada kewajiban ingkon ro manang parsidohot di na marhata sinamot, alana ndang adong dope panghataion disi na porlu sahat tu nasida. 

Toropni paranak di na marhata sinamot i, boi ma hira-hira 15 tu 20 ripe songon i nang torop ni parboru. Denggan do parsidohot 2-3 ripe dongan sahuta sian nadua bola pihak.

Partording ni Namarhata Sinamot
Di ari naung binuhul, ro ma paranak mamboan indahan na las dohot na marmiak­miak (rap dohot na margoarna). Parboru pe tong paradehon sipanganon manamba i na binoan ni paranak i, ima songon indahan na las, lompan (jagal manuk / rambingan, dengke dohot sayur manambai na binoan ni paranak i). Alana molo holan sipanganon na binoan ni paranak i olo do ndang cukup i. Molo di parserahan, marhata sinamot dipatupa do i dung sidung martumpol. Nasomal (di Toba) molo di tingki na naeng marhata sinamot dung sahat rombongan ni paranak tu alaman ni parboru, laho ma sahalak boru ni paranak i paboahon naung sahat nasida, huhut manungkun manang naung rade parboru i, manjanghon haroro nasida. Dung rade parboru i masuk ma rombongan ni paranak i tu bagas ni parboru i huhut mamboan sipanganon na binoan ni nasida i jala dipeakhon ma diatas meja. Dung masijalangan jala renta parhundul ni nasida, sahalak sian natua-tua (hira songon protokol) sian paranak manghatahon taringot tu sipanganon na binoan ni nasida.

HATA PARSINAMBUNG PARANAK :

Di hamu hula-hula nami (didok ma marga ni hula-hula i). Dison ro do hami marnatampak na mardongan tubu dohot boru nami songoni nang hula-hula dohot Tulang nami, mandapothon hamu. Mauliate ma di Amanta Debata Pardenggan Basa i, ala hipas do hamu dapot nami suang songoni nang hami pamoruon muna ro mandapothon hamu. Siala las ni roha nami huboan hami do sipanganon na tabo. Botima. Sahalak sian natua-tua ni parboru mangalusi. Tar songonon ma didok :


HATA PARSINAMBUNG PARBORU :

Di hamu Pamoruon nami raja…. (didok ma marga ni paranak i) dohot disude uduran muna. Mauliate ma tutu tadok tu Amanta Debata ala hipas do hamu ro mandapothon hami tu bagas nami on, suang songoni nang hami hipas dapot muna. Songon nanidok muna i, di boan hamu sipanganon na tabo si palas roha nami, mauliate ma di hamu” Dungi, disuru parboru i ma boruna laho paturehon huhut paradehon sipanganon. Laos dohot ma boru ni paranak i paradehon sipanganon i. Dung singkop diparadehon sipanganon i, dipasahat ma tudu-tudu sipanganon tu jolo ni suhut parboru. Tar songon on ma partonding na.


Mamboan Tudu-Tudu Sipanganon


HATA PARSINAMBUNG PARANAK :

Di hamu hula-hula nami (didok ma marga ni hula-hula i). Dison ro do hami mamboan tudu-tudu sipanganon na tabo asa anggiat dibagasan las ni roha muna hula-hula nami dibagas na marampang marjual on , songon hatani natua-tua na mandok :

Sititi ma sigompa, golang-golang pangarahutna
Otik sosadia tudu-tudu sipanganon na tupa,
Sai Tuhanta na mangalehon pasu-pasuna. Botima Rajanami.
Dung sidung dipasahat tudu-tudu sipanganon tu suhut parboru, ro ma muse suhut parboru mamboan dengke tu jolo ni suhut paranak.


HATA PARSINAMBUNG PARBORU :

Di hamu pamoruon nami, nunga dipasahat hamu tudu-tudu sipanganon tu hami. Hami pe sian hula-hula muna pasahaton dengke sahat, dengke simudur-mudur, pangidoan nami tu Amanta Debata asa tongtong ma hamu sahat tu pangidoan muna. Songon hata ni natuatua mandok :

Sititi ma sigompa, golang-golang pangarahutna
Tung songon i dengke sahat na tupa,
Sai Tuhanta na mangalehon pasu-pasuna. Botima



Marsipanganon

Ala paranak do na ro mamboan sipanganon laos nasida ma na mamboan tangiang mangan. Dung sidung marsipanganon di uduti ma muse tu na marbagi jambar. Tar songon on ma parbagian ni parjambaran (songon usul dope on)

Jambar tu paranak :
Sambola na marngingi hambirang.
Satonga osang Dua soit
Satonga rusuk (Panamboli)
Jambar tu parboru:
Sambola na marngingi siamun
Satonga osang
Dua soit
Satonga Rusuk (Somba-somba)
Ihur - ihur tu suhut parboru.

Alai na somal di pangarantoan on, osang ndang dibola, jambar tu parboru do i sude, ala marningot hita tu adat sian luat na asing, ia osang dipasahat nasida do i tu hula-hulana, jadi alani do umbahen ni usulhon asa dibagi dua ma osang i, parsiamun ma tu par boru, parhambirang tu paranak.

Catatan : molo marhata sinamot ndang dope didok jambar na gok (lengkap)


Masisisean

Anggo na jolo somal do masisisean na mardongan tubu (pihak paranak songon i nang pihak parboru) masirenggetan didok goarna, dung i pe asa parboru manise / manungkun paranak tarsingot tu sintuhu ni indahan masak dohot di haroro ni paranak i. Alai ala manghabit tingki, langsung nama pihak parboru manungkun pihak paranak. Tar songon on ma partording ni na masisisean, molo di parserahan on.



HATA PARSINAMBUNG PARBORU :

Manghatai ma hita amang boru. Parjolo ma tapasahat mandok mauliate tu Amanta Debata, ala asi dohot holong ni rohaNa, na mangiring-iring hita saluhutna sian ingananta be, ro tu bagas na marampang na marjual on, sigomgom pangisina dibagasan hahipason dohot las ni roha do hita nuaeng. Ia nunga hundul hita di atas ni amak tiar, sai tiar ma tutu panggabean, tiar parhorasan di hita on saluhut na. (molo di gedung jala pake kursi, didokma; ia nunga hundul hita di kursi na hot, sai hot ma panggabean songoni nang parhorason di hita on saluhutna) Nunga tutu bosur hita mangan, sagat marlompan juhut, dohot minum aek sitio-tio, sai pamurnas ma i tu daging, saudara tu bohi, sipaneang holi-holi ma i jala sipasindak panaili. Didok hata ni natuatua Raja ni boru :
Sai jolo ni nangnang do asa ni nungnung,
Sai jolo pinangan do asa sinungkun.

Antong dia ma langkatna, dia ma unokna, dia ma hatana, dia ma nidokna di sipanganon na pinasahatmuna, na bo i begeon ni sipareon jala na bo i peopon ni roha, songon hatani natua-tua na mandok :

Sandema ninna sige di bungkulan ni sopo,
Bangko ni hata do manise,
Molo so apala tangkas dope binoto.

Antong alusi hamu Raja ni pamoruon nami.

HATA PARSINAMBUNG PARANAK :

Dihamu raja ni hula-hula nami, andorang so hu alusi hami sungkun-sungkun ni Raja i, parjolo ma tutu ta pasahat hamauliateon ni rohanta tu Amanta Debata Pardenggan basa i, ala asi dohot holong ni rohaNa, na mangiring-iring hita saluhutna ro tu bagas na marsangap na martua on, di bagasan hahipason jala di bagasan las ni roha do hita sude. Nuaeng alusan nami ma tutu sungkun-sungkun ni Raja i. Ima tutu Raja nami, gabe ma hita angkup ni na horas, pasu-pasu on ni Amanta Debata. Ia nunga hundul hita tutu di atas ni amak tiar, sai tiar ma panggabean tiar ma nang parhorasan di hita on saluhutna, songoni nang tu joloan ni ari on. Di huhuasi ni si panganon na hupatupa hami, gabe ma Raja nami na taula i, asa adong habosurhononta, jala sinur ma pinahan na tapahan i asa adong hasagathononta. Ia nunga dipaboa hamu naung bosur mangan indahan las, jala sagat marlompan juhut, sai pamurnas ma i tutu tu daging saudara tu bohi, sipasindak panaili ma i sipaneang holi-holi di hita on saluhut na. Asa songon hata ni natua-tua ma dohonon :




Sititik ma sigompa, golang-golang pangarahutna,
Otik so sadia pe na tupa, sai godang ma pinasuna




Raja nami, ia sintuhu ni sipanganon na hupatupa hami , panggabean parhorasan do raja nami.

HATA PARSINAMBUNG PARBORU :

Ima tutu Raja ni pamoruon nami, nunga manise hami, mangalusi hamu, panggabean parhorasan do hape hata ni sipanganon na pinasahat hamu pamoruon nami.
Asa bagot na marhalto ma na niagatan di robean.
Horas ma amanta Raja dohot Inanta Soripada na manganhon,
Sai tamba ma hamoraon di hamu pamoruon nami na mangalean.

Hauma ni parsambilan ninna jonok tu pargadongan,
Sai martamba-tamba ma dihamu angka parsaulian
Mardapot-dapot nang angka pansamotan.

Alai raja ni boru, adong do hata ni natua-tua na mandok:

Asa hundul songon anian, jongjong songon pangurgasan,
Asa tangkas hita dapot parsaulian songoni nang di parhorasan,

Marangkup do ninna na uli, mardongan do na denggan,
Siangkupna songon na hundul, siudurna songon na mardalan,
Asa tangkas ma tutu uju ni purba tumangkasan dompak angkola,
Asa tangkas ma hita maduma jala tumangkasan ma nang hita mamora.
Antong di hamu pamoruon nami, angkup ni hata nauli dohot na denggan, sitangkas ni panggabean dohot parhorasan, tung denggan ma di paboa Raja ni pamoruon nami.


HATA PARSINAMBUNG PARANAK :

Ima tutu Raja ni hula-hula nami, ia marpanungkun ma Raja i di siangkupna songon na hundul, siudurna songon na mardalan, sitangkas ni panggabean dohot parhorason, paboaon ma tutu Raja nami, ia di bulan na salpu i laho do anak nami mardalani tu huta muna on. Pajumpang bohi ma ibana dohot boru ni Raja i, manghata i jala martarombo, gabe masibotoan ma nasida, na marboru ni tulang do hape anak nami tu boru ni Raja i. Dung piga-piga hali pajumpang jala manghata i Raja nami, tubu ma holong di nasida jala masiunduhan hata laho mamungka pardongan saripeon na imbaru. Tudos tu tona ni natua-tua namandok :

Denggan ma bulu godang, denggan bahen hite-hite
Molo adong anak manang boru magodang, denggan ma asa hot ripe
Ala ni i Raja nami, na manomba ma hami parjolo, asa janghon hamu nian anak nami on laho gabe hela muna.

 Alai raja nami, di haroro nami ditingkion tong do parjolo hami marsamtabi raja nami, alana molo mangasahon sibahenon do Raja nami, tung so bolas dope hami nian mandapothon hamu. Alai, ala tangkas do diboto hami, na burju marianakhon do hamu Raja nami, i do umbahen na hubaranihon hami ro mandapothon hamu, molo tung siat pangidoan nami, laos ditingkion ma nian hami laho pasahathon somba ni uhum, somba ni adat tu hamu Raja nami. Songon hatani natua-tua na mandok uli otik godang so sadia. Jadi olat ni na tarpatupa jala tarbahen hami, raja nami, ditingkion ma nian sombahonon nami somba nia adat dohot uhum tu hamu Raja nami. Jadi ima songon angkup ni panggabean dohot parhorasan, na bo i pasahaton nami tu hamu Raja nami. Botima.


HATA PARSINAMBUNG PARBORU :

Ima tutu di hamu pamoruon nami. Nunga tangkas di paboa hamu, disiangkupna songon na hundul, sidongan songon na mardalan, angkup ni panggabean dohot parhorasan di ulaonta sadarion. Jala toho do songon na nidok mu na i, adong do tona ni natua-tua na mandok,

Balga ninna anak pangolihononhon,
Balga ninna boru pahutaon. Nunga masiunduhan hata tutu boru nami didok hamu dohot anak muna, ima nanaeng mamungka pardongan saripeon na imbaru. Nang hami pe, dohonon nami do, sai rongkap na gabe, rongkap na sarimatua ma boru nami dohot anak muna tu joloan ni ari on. Asa anggiat ma nasida masibar songon ambalang, marrongkap songon tuak, jala tong-tong sada nasida songon daion mual. Asa nuaeng pe songon ni dok ni natua-tua ma dohonon nami :

Nunga pitu lili nami Paualu jugian nami,
Nunga uli nipinami ala nunga ro hamu manggohi hajut nami.
Jadi nuaeng pe raja ni pamoruon nami, songon dia ma sinamot na naeng pasahaton muna tu hami hula-hula muna, asa botoon nami mangarade puro nami laho inganan na. Ai tangkas do huboto hami,

Pat ni gaja do tu pat ni hora,
Anak ni raja do hamu,
Pahompu ni namora



Ai tung na malo do hamu, jala sigodang boto-botoan. Jadi on pe Raja ni pamoruon nami, angka dia ma sipasahaton muna sian na hugoari hami nangkin, na gabe sinamot ni boru nami. Hatahon hamu sian i.


HATA PARSINAMBUNG PARANAK :

Di hamu Raja hula-hula nami. Ia taringot tu somba ni uhum, somba ni adat songon sinamot ni boru ni Raja i, ima godang na Rp. _______ Juta.
Jadi pangidoan dohot elek-elek nami tu hamu Raja i tung ringgit sitio soara i ma sipasahaton nami tu hamu. Jala molo tung bo i nang pangidoan nami Rambu pinudun ma Raja nami Sinamot na naeng sipasahaton nami. Alai andorang so huhatahon hami, mangido ditingki ma hami asa jolo masisungkunan hami dohot dongan tubu nami, dongan sahuta, boru, songoni nang di namangido paniroion sian hula-hula nami.





Di hita na mardongan tubu dohot di hamu boru, bere, ibebere, songoni nang tu hamu dongan sahuta, tarlumobi di hamu hula-hula nami. Pinangido do tingki tu raja i, asa jolo masialapan hata hita, masiajar-ajaran, jala asa jolo sada hata ma hita nian, di na laho pasahat somba ni uhum, somba ni adat tu raja i, jadi songonon ma na boi pasahaton nami tu hita saluhutna :
Parjolo, ia ulaon na naeng ro on ba taruhon jual ma, di hita ma bolahan amak, na paduahon: ia sinamot na naeng sipasahaton tu raja i, ringgit sitio soarai ma, rambu pinudun, jala molo bo i pangidoan asa sisahali mangelekkon ma hita tu raja i di hata ni sinamot na naeng sipasahatonta, jadi songoni ma konsep na hupasahat hami asa jolo tangkas ma ajari jala tambor-tambori hamu hami. Mauliate. Hata on parjolo ma hupasahat hami tu hita na mardongan tubu. Dongan tubu (ni paranak) Di hamu parsinabung nami. Tangkas do hupaihut-ihut hami aha na pinasahat muna tu hami. Na manggogohon na ma hami nuaeng di pangidoanta tu hula-hula i Raja i….. (dipaboa marga di hula-hulai) asa rade roha ni ra ja i, sisahali manombahon, sisahali mangelekhon ma hita di sinamot ni boru ni Raja i. Botima.



HATA PARSINAMBUNG PARANAK :
Nuaeng hupasahat ma tu hamu, boru, bere dohot ibebere


Boru / Bere/ibebere ( ni paranak) :
Mauliate ma di hula-hula nami na mangalehon tingki di hami di ulaonta sadarion. Ia sian hami boru songoni nang bere muna na dohot do hami mangelek-elek hula-hula ni hula-hula nami naung di tariashon hamu nangkin. Sipanolopi ma hami di angka sangkap nauli dohot na denggan sian hula-hula nami. Botima.
HATA PARSINAMBUNG PARANAK :
Hupasahat ma muse tu hamu dongan sahuta
Dongan sahuta :
Mauliate ma, nang hami pe sian dongan sahuta, sipanolopi ma hami, asa si sahali mangelekhon ma hita tutu di sinamot ni boru ni Raja i, Botima.


HATA PARSINAMBUNG PARANAK :
Nuaeng hupasahat ma muse tu hamu hula-hula nami, ajari jala tambor-tambori hamu hami
Hula-hula ( ni paranak) :
Mauliate ma tadok tu Amanta Pardenggan Basa i, ala na dohot do Ibana paniroi di ulaonta sadarion. Jala tu hamu marga . . . . (laos di jouhon ma marga ni suhut paranak) dohonon nami ma, songon dia ma na denggan na boi tarbahen hamu tu hula-hula muna, ima ulahon hamu, alana adong do hatani natua-tua namandok:
Ndada ala ni godangna, umbahen na nieahan
Ndada ala ni otikna umbahen na ni tinggalhon
Sai sahat ma panggabean, sahat parhorasan di hita on saluhutna. Botima.


HATA PARSINAMBUNG PARANAK : 

Mauliatema di hamu raja ni dongan tubu, boru, bere, ibebere, songoni nang dihamu raja ni dongan sahuta, lumobi ma tu hamu raja ni hula-hula nami, nungga tutu satolop hita di napasahat sinamot ni boru ni Raja i, asa si sahali mangelekkon hita, jala ringgit sitio soara i ma ta pasahat tu Raja i. Jadi nuaeng pe di hamu Raja ni Hula-hula nami, nunga dibege hamu ia hami na mardongan tubu, boru, bere, ibebere, nang hami na mardongan sahuta, suang songoni di na hujalo hami panuturion sian hula-hula nami, naung sada hata hami, ima : Parjolo ma dohonon nami ia ulaon na naeng ro on taruhon jual ma, di hami ma bolahan amak. Jala somba ni uhum, somba ni adat na naeng si pasahaton nami tu hamu songon sinamot ni boru ni Raja i, ringgit sitio soara ima, rambu pinudun, jala sisahali mangelekkon ma hami Raja nami, laho pasahathon sinamot ni boru ni raja i tu hamu, songon hata ni tangiang, songoni ma jolo hata nami tu hamu Raja nami. Botima.
Catatan : taringot tu sisahali mangelekkon, denggan do jolo marhusip laho mambuat kesepakatan, parsinabung ni Paranak dohot Parsinabung ni Parboru, unang adong na mulak-ulak tu bona muse.


HATA PARSINAMBUNG PARBORU : 

Jadi di hamu Raja ni pamoruon nami, nunga tutu dipasahat hamu pangidoan muna tu hami, antong nang hami pe, lehon hamu ma jolo tingki di hami, asa masisungkunan nang hami na mardongan tubu, boru, bere dohot dongan sahuta nami, tarlumobi di paniroion ni hula-hula nami. Jadi on pe di hita na mardongan tubu, boru, bere/ibebere songon i nang hamu dongan sahuta, lumobi di hamu horong ni hula-hula nami. Nunga rap marbinege hita di pangidoan ni Raja ni pamoruonta apala di tingki on. Didok nasida ia taringot tu sinamot sipasahaton nasida, ringgit sitio soara ma jala sisahali mangelekhon / sisahali manombahon. Jala ulaon i taruhon jual. Songon dia ma alusta tu pamoruonta. Parjolo hupasahat hami tu dongan tubu. Dongan tubu (ni parboru) Di hamu parsinabung nami. Nunga tangkas hupaihut-ihut hami panghataion muna dohot Rajani pamoruonta. Songon dia naung di hatahon hamu. Laos songoni ma nang hata nami sian dongan tubu. Sisada hata ma hita. Botima.


HATA PARSINAMBUNG PARBORU : 

Hupasahat hami ma muse tu boru, bere, ibebere Boru (ni parboru) : Parjolo ma hupasahat hami hamuliateon ni roha nami di hamu Raja ni hula-hula nami naung pasahathon panghataion on tu hami pamoruon muna dohot horong bere muna. Ia taringot tu elek-elek ni pariban nami di sinamot na naeng sipasahaton nasida tu hamu Raja ni hula-hula nami, ba songon dia ma naung dihatai hamu, ianggo hami sian pamoruon muna, dohot bere muna, satolop ma hami di sude angka nauli dohot na denggan. Botima.


HATA PARSINAMBUNG PARBORU :
Hupasahat hami ma muse tu hamu raja ni dongan sahuta
Dongan Sahuta (ni parboru) :
Horas jala gabe ma di hita sasudena, lumobi di hamu suhut nami. Mauliate ma pinasahat tu hamu suhut nami ala di pajagar hamu panghataion on tu hami dongan sahuta muna. Nunga hubege hami panghataion muna na masipaolo-oloan jala masipaune-unean taringot tu sinamot ni borunta. Ianggo hami dongan sahuta, sipanolopi na uli na denggan ma. Songon hata ni natuatua, dohonon nami :
Aek godang, tu aek laut Dos ni roha, sibaen na saut. Botima.


HATA PARSINAMBUNG PARBORU : 

Nuaeng hupasahat hami ma muse tu hamu raja ni hula-hula nami
Hula - hula ( ni parboru) :
Parjolo mauliate godang hupasahat hami tu hamu pamoruon nami ala di pasahat hamu panghataion tu hami laho maniroi hamu. Taringot tu pangidoan ni Raja ni pamoruan muna, nunga masialusan hamu songon ogung na uli jala tangkas do i hupaihut-­ihut hami di ulaonta sadarion. Jadi songon dia ma naung ni tolopan muna anggo sian hami horong ni hula­hula muna manolopi ma hami, asa dapot hamu ma songon nidok ni natua-tua na mandok :

Balintang ma pagabe, Tumundalhon sitadoan Ari muna ma gabe,
Ai nunga denggan hamu hubege hami masipaolo-oloan.
Amporik marlipik, onggung marbabang
Gabe do parsinamot na otik, gabe do nang parsinamot na godang. Botima
HATA PARSINAMBUNG PARBORU :
On pe di hamu Raja ni pamoruon nami. Nunga satolop hami na mardongan tubu, boru/bere dohot dongan sahuta nami tarlumobi hula-hula nami taringot tu pangidoan muna na sahali mangelekhon hamu di sinamot ni boru nami. Alai porlu do hatahonon nami na dibagasan roha nami tu hamu, songon hata ni natua-tua namandok :

Ia marasar ma aili, sai ditarui bulung singkoru
Naeng ma sihar ma panaili, laho manjalo tuhor ni boru
Ndang pola be ra dohonongku, angka aha na solot di ate-ate, dohot na gompang di pusu-pusu, asa mangkilala ma hamu, songon dia nuaeng na dibagasan roha nami. Antong hatahon hamu ma manang na sadia pasahatonmuna sinamot ni boru nami.


HATA PARSINAMBUNG PARANAK : 

Mauliate ma Raja nami. Tung tangkas do huantusi hami na dibagasan rohamu na i, alai Raja nami songon hata ni natua-tua nang dohonon nami: Sai tuginjang ninna porda, sai tu toru parbar-baran Sai naeng do nian di didok roha hatop mamora, Alai hapogoson dope didok sibaran. Dipangidoan muna i, tangkas do huantusi hami, songon hata ni natua-tua na mandok :

Ni durung ma situma, laos dapot pora-pora
Molo buas do tu hula-hula, pintor hatop do iba mamora
Alai Raja nami, songon hata ni natua-tua na mandok :


Sai ni luluan do tandok, alai na dapot parindahanan
Tolap do pamangan mandok raja nami, alai ndang tolap jamaon ni tangan.
Molo tung songon dia pe Raja nami na tolap hami godang ni sinamot sipasahaton nami, uli ma roha ni hamu raja ni hula-hula nami. Jadi pasahaton nami ma sinamot ni boru ni Raja i Rp …………. , rambu pinudun Raja nami, jala si rambe manis. Naung disima talina, jala disi dohot rompuna naung disima daina, disi dohot holpuna. Botima Raja nami.


HATA PARSINAMBUNG PARBORU : 

Hamu Raja ni pamoruon nami, didok hamu sinamot Rp, …………. rambu pinudun, sirambe manis. Adong do hata ni natua-tua namandok :

Marmutik ma simarlasuma mardompakkon mata ni ari
Molo tung marhusor dope roha muna, manambai otik nari.

HATA PARSINAMBUNG PARANAK : 

Raja nami, hata ni natua-tua do mandok :

Ni dapot ma assosoit, tongon di tombara
Sotung ma didok hamu hami na mangkolit Raja nami, Da silehonon do na soada.
Uli ma rohamu manjalo sinamot ni boru ni raja i.
HATA PARSINAMBUNG PARBORU :

Raja ni boru, alai asing ni i, taringot todoan tu suhi ni ampang na opat ingkon tangkas do i alusan muna. ate Raja ni pamoruon nami.


HATA PARSINAMBUNG PARANAK :
Pos ma roha ni Raja i, ianggo todoan / panandaion tu suhi ni ampang na opat tangkas do i alusan nami.


HATA PARSINAMBUNG PARBORU :

Di hamu Raja ni pamoruon nami. Andorang so hugabehon hami jumolo ma husungkun hami hasuhuton nami. Ai adong do hata ni natuatua na mandok Lata pe na lata, duhut-duhut do si but-but on Hata ni Raja pinaraja, Raja ni hasuhuton do si sungkunon Jadi on pe nuaeng di hamu bona ni hasuhuton nami: Nunga tangkas di bege hamu panghataion nami dohot pamoruonta taringot tu sinamot ni borunta i. Nian tung godang do hupangido hami, alai tung songon i dope huroha na tarpatupa ni pamoruonta. Ia sinamot ni borunta na naeng sipasahaton nasida tu hita godang na Rp… rambu pinudun, sirambe manis. On pe panghataion on hupasahat hami ma tu hamu suhut nami. Hasuhuton ( ni parboru ) Di hamu Raja parsinabung nami. Nunga tung loja hamu tutu mangelek-elek Raja ni pamoruonta, didok nasida holan i nama natarpatupa nasida. On pe di hamu parsinabung nami gabehon hamu ma i.


HATA PARSINAMBUNG PARBORU :

Hamu Raja ni pamoruon nami. Ba nunga uli roha nami manjalo na nidok muna i. Sai gabe ma hita jala horas. On pe Raja ni pamoruon nami, pasahat hamu ma si namot ni boru nami, nunga rade hami manjalo.


HATA PARSINAMBUNG PARANAK :

On pe di hamu hasuhuton nami (suhut paranak), pasahat hamu ma patujolo (bohi) ni sinamot tu Raja ni hula-hulanta. Borhat ma hasuhuton paranak i pasahathon patujolo ni sinamot i tu raja parhata/parsinabung.
(Dung sae di etong laos di dok ma hata na, godang ni patujolo ni sinamot, jala sisana (nahurang) sipasahaton mai di mata ni ulaon nanaeng ro).


HATA PARSINAMBUNG PARBORU :

Nunga di Pasahat hamu patujolo ni sinamot ni boru nami, godangna Rp……., jala panggohi ni sinamot Rp….. pasahoton muna ma i di mata ni ulaon on.
(Dipasahat raja parhata ma bohi ni sinamot i tu suhut parboru). Di hamu suhut nami, nunga di pasahat pamoruonta bohi ni sinamot ni borunta Rp….., antong las roha mu manjalosa, sai anggiatma didongani Tuhan hamu laho manggunahon sinamot on hombar tu ringkotna, songon hata ni natuatua namandok:

Tonggi ma ninna sibahut, tabo ninna pora-pora
Molo dung las roha ni suhut, ba las ma nang roha ni angka raja.
(dipasahatma parsinabung ma tu inang ni boru muli)


HATA PARSINAMBUNG PARBORU :

Jadi di hamu pamoruon nami, ia tarsingot tu todoan / panandaion tu suhi ni ampang na opat dohot tintin marangkup, di hilala roha nami pasahat hamu ma i annon di mata ni ulaon on.


HATA PARSINAMBUNG PARANAK :

Mauliate ma di hamu raja ni hula-hula nami. Taringot tu napasahathon todoan / panandaion tu suhi ni ampang na opat dohot tintin marangkup, ima di pesta unjuk na naeng ro, songon na nidok muna i, ba satolop ma hami disi.


HATA PARSINAMBUNG PARBORU :

Di hamu raja ni pamoruon nami. Nunga dipasahat hamu patujolo (bohi ) ni sinamot. Nuaeng pe atik adong na naeng sipangidoon muna.


HATA PARSINAMBUNG PARANAK : 

Mauliate ma di hamu raja ni hula-hula nami. Ido tutu tohona. Dos do tuatna dohot nangkokna. Nangkin Raja nami nunga tahatai godang ni sinamot sipasahaton nami tu hamu, jala nunga hupasahat hami tu hamu patujolo ni sinamot. Asa on pe Raja nami pangidoan nami tung sude do hami ulosan muna. Ai huboto hami do angka nantulang i, na malo do martonun.


HATA PARSINAMBUNG PARBORU :

Toho do i pangidoan muna i, Raja ni boru. Alai molo tung so sude pe hamu ulosan nami dohot ulos herbang ianggo ulos natinonun sadari pasahaton nami do i tu hamu sude. Ianggo di tingki on ulos herbang na naeng sipasahaton nami tu hamu ba …… lembar ma. (Didok ma godang ni ulos i). Uli ma roha muna manjalosa.


HATA PARSINAMBUNG PARANAK :

Gabe jala horas Raja nami. Mauliate ma di hamu.
Catatan : Dung sidung masisisean, jala nunga tangkas di hata i sadia godang ni sinamot dohot todoan / panandaion, tu suhi ni ampang na opat, jala nunga dipasahat patujolo ni sinamot. Somalna do i ndang pola dipasahat sude sinamot i asa adong pasahaton ni paranak tu parboru i di ulaon unjuk jala digoarimai panggohi ni sinamot.
Dung sidung i dipahantus ma muse panghataion songon naung di taringoti di na patua hata / marhori-hori dingding, manang di tingki namarhusip ima taringot tu :
Tintin marangkup tu tulang ni pangoli. Sadia godang na naeng pasahathon ni nasida (sadia sian paranak sadia sian parboru i). Alai sipata holan na dua hasuhuton do namangkatai taringot di si.

Pinggan panganan tu parboru dohot ulos-ulos tu paranak.

Godang ni undangan ni paranak dohot parboru.
Mambuhul ari (tingki) dohot manontuhon inganan (Gareja) manjalo pasu-pasu dohot (Gedung) tu pesta unjukna.

Parbagian ni parjambaron di ulaon unjuk. Laho manghabit/mempersingkat waktu di ulaon unjuk unang pola be dihata i taringot tu parbagian ni jambar disi, alai di tingki na marhata sinamot i ma i dipahantus ( hira songon jambar mangihut ma di ulahon )
Catatan : Molo jambar mangihut di Laguboti (Toba) ndang adong be di pasahat tudu-tudu ni sipanganon tu parboru di acara andorang so mangan, songon i nang parboru, ndang dipasahat nasida be dengke tu paranak, jadi langsung nama angka parhobas manang naung dipatudu hian pasahat jambar tu parboru dohot dengke tu paranak, lapatanna ndang adong be acara laho pasahat tudu-tudu ni sipanganon dohot pasahat dengke.

Molo tung bo i disepakati ma di na marhata sinamot i angka panandaion namargollit, songon i nang godang ni panandaion tu parboru misalna disepakati ma150 amplop, asing ni horong ni hula-hula nasida. Songon i nang ulos-ulos tu paranak ditetaphon ma jumlahna misalna 100 Amplop, di ruar ni ragi-ragi tu horong ni hula-hula. Tujuanna laho manghabit tingki.

Dohot angka na asing na mardomu tu ulaon unjuk
Dung sidung panghation, di pasahat Raja parhata ni paranak ma muse tu pihak parboru laho mangunjungi ulaon. Andorang so ditutup hula-hula ulaon i, digorahon Raja parhata ni parboru ma tu suhut paranak dohot tu suhut bolon parboru, asa di lehon nasida olop-olop. Dung dipadomu (dipasada) raja parhata ni parboru olop­olop na sian paranak dohot parboru i, dilehon ma tu Raja Huta (Dongan sahuta ni suhut sesuai di alaman ni ise ulaon i). Di dok raja huta ma hatana andorang so dibagi olop-olopi.

HATA SIAN RAJA NI HUTA

Dihamu suhut nami, nunga tung tangkas pinaihut-ihut ulaonta on, tama do hita mandok mauliate tu Debata Pardenggan basa I, ala asi dohot holong ni rohaNa do, dibahen na bo i ture jala denggan mardalan ulaonta on. Saut ma tutu songon hata ni natua-tua :

Balintang ma pagabe tumundalhon sitadoan,
Saut ma hita horas jala gabe ala nunga denggan hita masipaolo-oloan.
Asa Uli ma ninna porda, pandohotan ni hulamot
Sai tong-tong ma hita dapotan uli dohot las ni roha
Laos mangihut ma dohot sinamot

Simbora ma guk-guk, peak di lage-lage,
Mamora ma hita on luhut, Horas jala gabe


Asa Silallan uruk uruk tu silallan aek toba,
Nametmet ndang marungut-ungut
Na magodang sude marlas ni roha.
Laos digorahon Raja huta ma muse asa sude na torop i mandok olop- olop tolu hali huhut disaburhon boras sipir ni tondi. Marlapatan asa sude na torop i mangolophon nauli dohot na denggan, disude angka pasu-pasu na pinasahat ni angka Raja.

Acara Marsibuha-Buhai

Marsibuha-buhai merupakan awal dari acara pemberkatan nikah dan acara marunjuk (pesta adat dalam tradisi suku Batak Toba). Maksud dan tujuan acara Sibuha-buhai yakni memberi hormat kepada pengantin wanita sebagai Boru ni Raja yang sudah rela meninggalkan rumahnya menuju rumah suaminya dan memberi kesempatan kepada keluarga dekat/hasuhuton untuk mengisi perut (makan) karena seharian keluarga pengantin laki-laki datang ke rumah pengantin perempuan untuk menjemput mempelai wanita dan bersama-sama berangkat ke gereja karena hanya sedikit waktu untuk makan untuk mengikuti rangkaian acara gereja maupun acara di gedung. Untuk acara ini kedua belah pihak wajib menyediakan makanan adat berupa seekor babi (martudu-tudu) yang disediakan oleh paranak dan dengke adat disediakan oleh Parboru sedang bobot dan banyaknya tergantung kondisi dan situasi undangan.

1. MARSIBUHABUHAI

Paranak mamboan na marmiak‑miak na margoarna, jala parboru pe tong do paradehon dengke sitio‑tio dohot sipanganon na asing manambai sipanganon nabinoan ni paranak i.
Dipasahat paranak ma tudu-tudu ni sipanganon sibuha-buhai :

HATA PARSINABUNG PARANAK

Di hamu raja ni hula-hula nami, nuaeng ro do hami pamoruon mu na, pasahathon las ni roha nami, ima sipanganon na tabo. Tangan do tutu marsomba, dohot soara marhuhuasi, di sipanganon na otik so sadia na huboan hami on. On ma tutu raja nami, songon sipanganon sibuha-buhai di ulaonta sadarion, na mamuhai partuturonta di manogot on, asa buha ma angka parsaulian, buha nang panggabean dohot parhorason di hita on saluhut na. Songon hata ni natuatua ma dohonon nami :


Asa sititi ma si gompa, golang-golang ma pangarahutna
Otik sosadia pe na tupa, sai godang ma pinasuna. Botima


Dung sidung dipasahat paranak tudu-tudu ni sipanganon sibuha-buhai, dipasahat pihak parboru ma muse dengke :


HATA PARSINABUNG PARBORU

Dihamu pamoruon nami, rodo hami dison mamboan dengke na tabo. Songon naung dihatahon hamu nangkin, mamuhai partuturonta ma hita tutu di manogoton, asa ojak ma partuturon ta, sai diramoti jala tongtong didongani Tuhan Debata ma hita, ala nunga sada tahinta laho pataruhon boru nami na gabe parumaen mu dohot anak muna na gabe hela nami tu bagas joro ni Tuhanta, laho manjalo pasu-pasu parbagason marhite-hite naposoNa. Ojak ma nang pardongan saripeon nasida, tong-tong sada nasida songon daion mual.
Asa dengke tio maon tutu, marpangidoan hita tu Amanta Debata, asa tio jala tiurma pardalan ni ulaonta ditingkion, dao angka abat-abat. Jala dengke sahat maon tutu, asa sahat ma na denggan, sahat nang angka nauli di ulaonta ditingkion, songon hata ni natuatua dohonon nami :


Sahat-sahat ni solu, sai sahatma tu bontean
Sahat ma ulaonta sadarion dipasu-pasu Tuhan, sahat tu parhorasan, sahat tu panggabean. Botima.


Diuduti ma tu namar sipanganon. Nang pe adong tudu-tudu ni sipanganon, ndang gabe jambar sibagion dope i, alai molo tung pe dibagi, ndang pola digorahon, langsung ma dipasahat, hombar tu horong na ro ditingki i. Dung sidung marsipanganon diuduti muse martangiang andorang so borhat tu Gareja, somalna sian hula-hula do mamboan tangiang.


2. PAMASUMASUON DI GAREJA
Andorang so pamasumasuon, somalna jolo dibahen do acara cacatan sipil (petugas catatan sipil) di kantor ni Gereja i. Dung sidung acara cacatan sipil masuk ma tu Gereja, di jolo ma pangoli / boru muli diuduti pandongani, natoras ni pangoli/ boru muli dohot angka tutur na solhot. Dung sidung acara pamasu‑masuon i, mandok hata do paidua ni suhut sian paranak dohot sian parboru. Di na mandok hata, inti ni pangkataion hira mandok mauliate tu huria dohot tu sude tutur na ro, huhut manggorahon asa rap borhat tu inganan pesta unjuk, laho mangan indahan na las dohot minum aek sitiotio huhut manjalo dohot pasahathon adat na hombar tu ulaon i.


3. PESTA UNJUK DI GEDUNG

Taringot tu parmasuk ni pengantin, paranak, parboru dohot horong hula‑hula / tulang ni nadua hasuhuton tu bagasan gedung, disesuaihon ma i tu sifat ni ulaoni, lapatan na, di alaman ni ise ulaon i. (di alap jual manang di taruhon jual ).
Ulaon Ditaruhon Jual ( di alaman ni paranak)
Ulaon di taruhon jual lapatanna ulaon i di alaman / huta ni paranak. Mardomu tusi boi ma dongan tubu, boru dohot tutur na ginokhon ni paranak i masuk tu gedung pesta alai ndang dohot horong hula‑hula/ tulang ni nasida. Alana hira songon huta/alaman ni paranak i do gedung i. Dung hundul be nasida masuk ma pengantin dohot rombongan ni suhut. Dijolo ma pengantin dohot pandongani, ihut ma natoras ni pangoli dohot si solhot ni paranak. Dung jumpang tingkina di gorahon protokol ni paranak ma asa masuk horong ni hula-hula ni paranak.
Parjolo ma sian hula-hula natoras ni namangoli, dungi tu tulang, tulang rorobot, hula-hula namar haha maranggi, dungi tu hula-hula naposo, ima hula-hula ni ianakkon ni natoras ni pangoli manang hula-hula ni haha ni pangoli angka naung sohot, jala olo hula-hula ni anggina molo mangalangkai. Dung sidung i dijou protokol ni paranak ma asa masuk hula-hula ima Parboru. Masuk ma nasida, parjolo ma natoras ni boru muli, mangihut ma muse na mamboan tandok bolon dohot na mamboan dengke. Na mamboan tandok bolon, i ma paniaran ni haha manang anggi manang parumaen ni pihak parboru. Dungi mangihut ma muse haha‑anggi dohot si solhot ni nasida, ama di sambola siamun, ina di sambola hambirang huhut manghunti tandok. Sude nasida manghadang ulos di ambara siamun. Masuk ma nasida marudur dohot renta. Na mamboan dengke di pudi ni na namboan tandok bolon. Dung masuk rombongan ni par boru i, di gorahon protokol ni parboru ma asa masuk hula‑ hula/tulang nasida.